Paak Dhoye Huve Kapdoñ Ko Napaak Kapdoñ Par Rakhne Se Paaki Ka Hukm Neez Jeans Ki Pent Or Kapdoñ Ko Paak Karne Ka Tareeqa

 *Paak Dhoye Huve Kapdoñ Ko Napaak Kapdoñ Par Rakhne Se Paaki Ka Hukm Neez Jeans Ki Pent Or Kapdoñ Ko Paak Karne Ka Tareeqa*

*🌹SAWAL:-🌹*

Assalamu Alaikum 

Zaid Ki Jeans Ki Pent Par Napaki Lag Gyi Toh Wo Use 3 Baar Dhoya Nichod Lia Fir Wo Us Paak Kapde Ko Napaak Kapde Par Rakh Diya Jisse Napak Kapda Tar Ho Gaya Toh Kya Ab Wo Pak Jeans Pent Bhi Wapas Napak Ho Gyi Kya?

Jeans Ka Mota Kapda Hai Use Paak Kaise Kre Eski Tafseel Se Bataye Aur Nal Ke Niche Kaise Paak Kre ?

*🌹JAWAB:-🌹*

وَعَلَيْكُم السَّلَام وَرَحْمَةُ اَللهِ وَبَرَكاتُهُ‎

Vo Jeans Ki Pent Paak Hi Rahegi Napaak Nahiñ Hogi.

Soorate Mazkura Me Jeans Ki Pent Ke Napaak Hone Ke Liye Zaroori He Ki Iski Tari Us Napaaki Par Lage or Fir Us Napaak Pent Ki Tari Us Paak Jeans Par Lage, Tab Kahiñ Ja Kar Ye Jeans Ki Pent Napaak Hogi, Lekin Jo Soorat Aap Ne Puchhi He Usme Zahir Yahi He Ki Jeans Ki Pent Ko Aapne Paak Kar Liya Fir Uski Tari Napaak Pent Par Lagi Lekin Us Napaak Pent Ki Tari Dubara Us Jeans Ki Pent Me Nahiñ Lagegi, to Aysi Soorat Me Vo Jeans Ki Pent Paak Hi Rahegi..

Jaisa Ki Bahare Shariyat Me He,

Napaak Kapde Me Paak Kapda Ya Paak Me Napaak Kapda Lapeta or Us Napaak Kapde Se Ye Paak Kapda Nam Ho Gaya to Napaak Na Hoga Basharteki Najasat Ka Rang Ya Boo Us Paak Me Zahir Na Ho, Warna Nam Ho Jane Se Bhi Napaak Ho Jayega, Haañ Agar Bhig Jaye to Napaak Ho Jayega or Ye Isi Soorat Me He Ki Vo Napaak Kapda Paani Se Tar Huva Ho or Agar Peshab Ya Sharab Ki Tari Usme He to Vo Paak Kapda Nam Ho Jane Se Bhi Najis Ho Jayega or Agar Napaak Kapda Sukha Tha or Paak Tar Tha or Us Paak Ki Tari Se Vo Napaak Tar Ho Gaya or Us Napaak Ki Itni Tari Pahunchi Ki Usse Chhut Kar Us Paak Ko Lagi to Ye Napaak Ho Gaya Warna Nahiñ.

*📚(Bahare Shariyat, H-2, Najsasatoñ Ke Muta'alliq Ahkaam, Mas'ala-34)*

Kapdoñ Ko Paak Karne Ka Tariqa Ye He Ki Agar Vo Nichod Ne Ke Qabil Ho to Fir 3 Martaba Quwwat Ke Sath Nichod Kar Usko Paak Kiya Jayega, Jab Ki Najaasat Raqeeq Ho, Patli Ho... Or Agar Najaasat Gadhi Ho Nazar Aati Ho Jaisa Ki Pakhana, Gobar Wagairah to Fir Usko Dur Karna Zaroori He, to Agar Ye Pakhana, Gobar Ya Mani Wagairah Ek Hi Martaba Dhone Me Door Ho Gai to Jeans Ki Pent Paak Ho Gai. Albatta 3 Martaba Dho Lena Mustahab He, Lekin Agar Baar Baar Dhone Se Bhi Door Nahiñ Hui to Jab Tak Vo Napaaki Lagi Rahegi Jeans Ki Pent Napaak Hi Rahegi Paak Nahiñ Hogi.

Lihaza Baar Baar Us Par Paani Bahaye, Usko Chhudaye Nakhun Se Us Napaaki Ko Khurad Kar Dur Kare, Agar Najasat Galiza Ho Gharhi Ho.. 

Or Raqeeq Yaani Najsasat Jirm Daar Na Ho to Fir Aysi Soorat Me 3 Marataba Quwwat Ke Sath Nichod Ne Se Kapda Paak Ho Jayega..

Haañ Agar Nal Ke Niche Usko Rakh Diya Jaye or Paani Khub Bahaya Jaye Hatta Ki Yaqeen Ho Jaye Ki Ab Jo Najasat Thi Vo Bah Kar, Juda Ho Kar Bah Gai Hogi to Is Soorat Me Bhi Vo Kapda Paak Ho Jayega. Lekin Jab Najasat Gharhi Hogi to Zahir Si Baat He Usko Ragadna Padega, Ki Ragde Bagair Vo Door Nahiñ Hogi..

Ye to Us Kapde Ko Paak Karne Ka Tareeqa Tha Jisko Quwwat Ke Sath Nichoda Ja Sakta He.. 

Lekin Agar Koi Kapda Aysa He Misal Ki Taur Par,

Jeans Ki Pent Itni Garhi He Ki Usko Quwwat Ke Sath Nichoda Nahiñ Ja Sakta to Fir Usko Paak Karne Ka Tareeqa Ye He Ki Pahle Usko Pura Bhigo Diya Jaye, Paani Se Tar Kar Liya Jaye, Fir Usko Taang Diya Jaye, Jab Tak Uske Andar Ke Tamam Qatre Bah Na Jaye Us Waqt Tak Usko Waise Hi Rakha Jaye, Jab Sab Qatre Bah Jaye Ab Koi Qatra Nahiñ Bahta To Fir Dubara Us Par Paani Daale Pura Usko Bhigo Kar Dho Dale Fir Usko Taang De, or Tapakne Ke Liye Usko Chhod De, Jab Tamam Qatre Tapak Jaye Ab Koi Bhi Qatra Na Tapke to Tisri Martaba Fir Us Par Paani Daale, Fir Usko Bhigoye or Usko Taang De Jab Tak Ki Uske Saare Ke Saare Qatraat Tapakna Band Na Ho Jaye.. Teen Martaba Is Tareeqe Se Karne Se Kapda Paak Ho Jayega.

Wallahu Ta'ala Aa'alam Bis-sawab 

*_🎙 Al-Jawab:- Hazrat Allama Mufti Taufiq Raza Sahab Misbahi_*

*📬Tadriso Ifta Darul Uloom Qadriyah Razviyah, Petlad*

*🗓️5 Aug 2024, 29 Muharramul Haram 1446*

*🌹SAWAL-O-JAWAB🌹F.T.S👑grp*

📲+918

*_📬Pathan Moin Raza Khan,Petlad_*

•┈┈┈┈┈┈• • ✦ ✿ ✦ • •┈┈┈┈┈┈•

*Amanat Me Khayanat Na Kare Yaani Post Ke Sath Chhedchhad Karne Ki Ijazat Nahiñ... Agar Kuchh Khami Ya Lafzi Galti Nazar Aaye To Admin Se Rabta Kare*