Shohar Ne Biwi Ko 3 Talaq Di Or Inkar Kare, Aur Aurat Ke Paas Gawah Na Ho To Kya Hukm Hoga?

 *Shohar Ne Biwi Ko 3 Talaq Di Or Inkar Kare, Aur Aurat Ke Paas Gawah Na Ho To Kya Hukm Hoga?*

*🌹SAWAL:-🌹*

Shohar Ne Phone Ke Zariye Se Apni Biwi Ko Teen Talaaqein Deen, Magar Shohar Inkaar Karta Hai Aur Aurat Ke Paas Koi Gawah Bhi Nahi Hai. Magar Aurat Kehti Hai Ke Usne Mujhko Yaqeenan Teen Talaaq Di Hai. To Aisi Soorat Mein Kya Hukum Hai?

*🌹JAWAB:-🌹*

Soorate Mas’ool Ka Jawab Yeh Hai Ke Aurat Agar Teen Talaaq Ka Da’Wa Karti Hai to Is Par Zaroori Hai Ke Woh Gawah Pesh Kare. Agar Gawah Pesh Na Kar Saki to Shohar Ka Qoul Qasam Ke Saath Muatabar Hoga.

Albatta Shohar Munkir Hone Ki Soorat Mein Jabke Aurat Ko Yaqeen Hai Ke Usne Teen Talaaq Di Hai, to Aurat Hargiz Shohar Ke Paas Na Jaaye, Aur Na Us Ki Zawjiyat Par Raazi Ho, Jaise Mumkin Ho Us Se Judai Ikhtiyar Kare. Phir Bhi Shohar Jabr Karta Hai to Iska Sara Wabaal Aur Gunaah Shohar Ke Sar Hoga.

Fatawa Rizwiyah Shareef Mein Sayedina Aala Hazrat Radiyallahu Ta'Ala Anhu Is Tarah Ke Sawal Ke Jawab Mein Tahreer Farmate Hain:

Or Uska Inkar Allah AzzaWaJall Ke Yahañ Kuchh Nafa'a Na Dega Un Gawahoñ Par Farz He Ki Gawahi Deñ Or Agar Unme Do Mard Ya Ek Mard Do Aurteñ Siqqa Aadile Sharaee Hoñ Talaq Sabit Ho Jayegi Or Uska Inkar Duny Me Bhi Na Suna Jayega Or Agar Usme Ayse Gawah Na Hoñ Or Aurat Ke Samne Talaq Na Di Ho To Aurat Usse Halaf Le, Agar Woh Halaf De Ke Maine Talaaq Na Di to Aurat Apne Aap Ko Us Ki Zawja Samjhe. Agar Usne Halaf Uthakar Jhoota Kiya to Wabaal Us Par Hai, Agar Khud Zawja Ke Samne Usne Teen Talaaqein Dein Aur Munkir Ho Gaya Aur Gawah Aadil Nahi Milte, to Aurat Jaise Jane Us Se Rihayi Le, Agar Chahe Apna Mahr Chhod Kar Ya Aur Maal De Kar, Aur Agar Woh Yuñ Bhi Na Chhode to Jaise Ban Pade Us Ke Paas Se Bhaage Aur Usey Apne Upar Qaboo Na De. Aur Agar Yeh Bhi Na Mumkin Ho to Kabhi Apni Khwahish Se Us Ke Saath Zan O Shohar Ka Bartaav Na Kare Na Us Ke Majboor Karne Par Us Se Raazi Ho, Phir Wabaal Us Par Hai. 

لَا یُكَلِّفُ اللّٰهُ نَفْسًا اِلَّا وُسْعَهَا

(Allah Ta’Ala Wus’at Ke Mutabiq Hi Kisi Jaan Ko Takleef Deta Hai)."

*📚(Fatawa Razviya Mutarjim, Jild-12, Safha-424, Mas'ala-200)*

Wallahu Ta'ala Aa'alam 

*✍🏻Al-Jawab: Hazrat Maulana Ashraf Qadri Alimi Sahab Qibla*

*📬Madarsa Lateeful Uloom, Raza Nagar Jigna Mirzapur, Up*

*🗓️10 Aug 2025,15 Safar 1447*

*🌹SAWAL-O-JAWAB🌹F.T.S👑grp*

📲+91

*_📬Pathan Moin Raza Khan,Petlad Gujrat_*

•┈┈┈┈┈┈• • ✦ ✿ ✦ • •┈┈┈┈┈┈•

*Amanat Me Khayanat Na Kare Yaani Post Me Tabdili Karne Ki Ijazat Nahiñ. Agar Kuchh Khami Ya Lafzi Galti Nazar Aaye To Admin Se Rabta Kare*