Dalaailul Khairat Shareef Parhne Ka Tareeqa Aur Iske Fawaaid

 *Dalaailul Khairat Shareef Parhne Ka Tareeqa Aur Iske Fawaaid*

*🌹SAWAL:-🌹*  

Dala’Il Al-Khairat Shareef Humein Kab Parhna Chahiye Aur Iske Parhne Ka Tareeqa Kya Hai Aur Iske Fawaaid Kya Hain? 

*🌹JAWAB:-🌹*  

Jahañ Tak Iske Fawaaid Ka Ta’Alluq Hai to Main Itna Bata Doon Ke Yeh Nabi E Kareem ﷺ Par Mukhtalif Durood Paak Ke Seegoñ Ka Majmooa Hai Jo Duroode Paak Nabi E Paak ﷺ Se Khud Saabit Hai, Isi Tarah Sahaba-E-Kiraam, Taba’een, Taba Taba’een, Akaabire Ummat Aur Awliyae Kiraam Ne Durood Paak Ke Mukhtalif Seeghe Jo Waz’a Kiye, Un Tamaam Muqaddas Hazraat Ke Durood Paak Ko Is Kitaab Mein Jama'a Kar Diya Gaya Hai. Lihaza Duroode Paak Parhne Ke Jo Fazaail Hain, Woh Is Kitaab Ko Parhne Se Ek Saath Haasil Honge Aur Yeh Kitaab Bargahe Risalat Ma’ab ﷺ Mein Intehaai Maqbool Hai.

Imam Sulaiman Jazuli Rahmatullah Alaih Ka Inteqal Hijri San 870 Mein Hua Hai, Usi Daur Se Ab Tak Poori Duniya Mein Khaas Kar Arab Shareef Mein Is Kitaab Mubarak Ki Ijazat Lene Aur Parhne Ka Riwaj Chala Aa Raha Hai.  

Raha Yeh Sawaal Ke Iske Parhne Ka Kya Tareeqa Hai ? To Imam Jazuli Rahmatullah Ta’Ala Alaih Ne Is Kitaab Ki Alag-Alag Taqseem Ki Hai. Is Ki Pehli Taqseem to Yeh Hai Ke Ise Aath (8) Hisson Mein Taqseem Kiya Hai, Har Hisse Ka Naam Unhone ‘Hizb’ Diya Hai, to Is Kitaab Ke Kul Aath Hizb Hue. Aur Hamare Buzurgoñ Ka Yeh Mamool Hai Ke Peer Ke Roz Isay Parhna Shuru'a Karte Hain, to Aaindah Peer Ko Aathwaañ Hizb Mukammal Hoga Aur Usi Roz Phir Pehla Hizb Parhna Hai.  

Doosri Taqseem Yeh Hai Ke Musannif Ne Is Poori Kitaab Ko Chaar Hisson Mein Taqseem Kiya Hai. Zahir Hai Ke Jab Is Ke Aath Hizb Honge to Is Lihaz Se Agar Poori Kitaab Ke Chaar Hisse Kiye Jayein to Har Do Hizb Par Ek Chauthai Mukammal Hogi. Agar Aap Is Tarah Parhna Chahte Hain to Rozana Do Hizb Ki Tilawat Karein.  

Teesri Taqseem Yeh Hai Ke Musannif Ne Poori Kitaab Ko Teen Hissoñ Mein Taqseem Kiya Hai. Agar Aap Ke Paas Waqt Mein Faraghat Zyada Hai to Rozana Aap Ek Tihaai Parhein. Aur Matbooa Kitaab Mein Yeh Milta Hai Ke Pehli Tihai Kahañ Tak Hai, Doosri Tihai Kahan Tak Hai Aur Teesri Tihai Kahan Tak Hai, to Is Lihaz Se Bhi Aap Parh Sakte Hain. Is Lihaz Se Teen Din Mein Kitaab Mukammal Ho Jayegi.  

Khulasa Yeh Ke Aap Ke Paas Jitna Waqt Ho, Us Lihaz Se Aap Parhein, Tafseel Maine Bata Di. Is Ke Shuru Mein Nabi Kareem ﷺ Ke Asmaa E Tayyiba Aur Kuch Ad’iya Mazkoor Hain, Agar Waqt Mein Gunjaaish Hai to Ibtida Se Is Ko Parhein, Warna Kabhi Kabhi Parh Liya Karein. Agar Aur Waqt Mein Gunjaish Nahiñ to Hizb Awwal Se Parhna Shuru Karein.  

Raha Yeh Ke Hum Kab Parhein to Rozana Aap Ek Waqt Muqarrar Kar Liya Karein Aur Us Waqt Rozana Parhne Ka Ek Mamool Bana Liya Karein.  

*✍🏻Al-Jawab: Khalifa E Huzur Muhaddise Kabeer W Huzur Qaide Millat, Hazrat Mufti Muzzammil Barkati Misbahi Sahab Qibla*

*📬Khadim Tadreeso Ifta Darul Uloom Anware Madina, Jamkhambhaliya Gujarat*

*🗓️11 Aug 2025, 16 Safar 1447*

*🌹SAWAL-O-JAWAB🌹F.T.S👑grp*

📲+918

*_📬Pathan Moin Raza Khan,Petlad Gujrat_*

•┈┈┈┈┈┈• • ✦ ✿ ✦ • •┈┈┈┈┈┈•

*Amanat Me Khayanat Na Kare Yaani Post Me Tabdili Karne Ki Ijazat Nahiñ. Agar Kuchh Khami Ya Lafzi Galti Nazar Aaye To Admin Se Rabta Kare*