Exam Me Copy Karna Kesa Or Uske Baad Mili Job Se Hasil Shuda Raqam Ka Hukm ?

 *Exam Me Copy Karna Kesa Or Uske Baad Mili Job Se Hasil Shuda Raqam Ka Hukm ?*

*🌹SAWAL:-🌹*

Exam Mai Copy Karnaa Kaisa 

Shariat Ka Kya Hukum Hai 

Aur Phir Agay Job Karne Ka Ka Kya Hukum Hoga ? Or Uski Tankhwah Ka Kya Hukm Hoga?

*🌹JAWAB:-🌹*

اَلسَلامُ عَلَيْكُم وَرَحْمَةُ اَللهِ وَبَرَكاتُهُ

Imtehan (Exam) Me Naql Karna, Copy Karna, Jhuth, Dhoka Dahi, Fareb or Haq Daaroñ Ki Haq Talfi Karna He Jo Shar'an Najaaizo Gunah He, Isse Taubah W Astagfaar Lazim He... 

Or Ye Qanoonan Bhi Jurm He, Aur Pakde Jaane Ki Surat Me Zillat O Ruswayi Ki Bhi Wajah Hai, Aur Ye Dhoka Aur Fareb Hai Jo Shaksh Kisi Cheez Ka Ahel Nahiñ, Aur Na Hi Usne Mehnat Ki Hai Aur Vo Use Hasil Karta Hai Ye Dhoka Dena He Jo Shar'an Najaaiz O Gunah Hai..

Sayyadi Ala Hazrat Azimul Barkat Farmaten Hai,

Kisi Aise Kaam Ka Irtekab Jo Qanoonan Najayez Ho Aur Jurm Ki Had Tak PahuñChe Shar'an Bhi Najayez Hoga Ki Aisi Baat Ke Liye Jurm Qanooni Ka Murtakib Ho Kar Apne Aap Ko Zillat O Ruswai Ke Liye Pesh Karna Hai Jo Shar'an Bhi Rawa Nahiñ.

*📚(Fatawa Razviya Mutarjim, Jild-20, Safha-192)*

Mustafa Karim ﷺ Ne,

Momin Ko Apne Aap Ko Zillat  Me Dalne Se Mana Farmaya Hai..

Or Jo Bina Copy Aur Naqal Kiye Exam De Rahe He Unki Haq Talfi Bhi Hai Isme, or Jhuth W Dhoka Bhi Hoga,

Aala Hazrat Alaihir Rahma Farmate Hai,

Gadr (Dhoka) W Bad-Ahdi Mutlaqan Har Kafir Se Bhi Haram He.

*📚(Fatawa Razviya Mutarjim, J-17, S-348)*

Or Agar Kisi Ne Is Tarah Exam Me Copy Kar Ke Mulazimat Ya Job Hasil Karli to Jo Tankhwah Uski Hogi Uske Haram Ya Halal Hone Se Muta'Alliq Ye Zabta He Ki Agar Mazkoora Shakhs Muta'Alliqa Nokri Ya Mulazimat Ki Salahiyat Rakhta Ho or Uske Tamam Umoor Dayaanat Daari Ke Sath Anjam Deta Ho Yaani Matlooba Waqt Dene Ke Sath Sath Vo Zimmedari Usi Meyaar Ke Mutabiq Ada Kare Jo Us Mansab Ke Liye Matloob He to Uski Tankhwah Halal Hogi, Is Liye Ki Tankhwah Halal Hone Ka Ta'Alluq Faraaiz Ki Durust Adayegi Se He. Or Agar Vo Shakhs Us Mulazimat or Nokri Ka Ahal Nahiñ He, Ya Ahal to He Magar Dayanat Daari Ke Sath Kaam Nahiñ Karta to Uski Tankhwah Halal Nahiñ Hogi..

Fatawa Razviya Me He,

Na Ahal Ko Usme Haath Dalna Haram He or Uska Tarq Farz.

*📚(Fatawa Razviya Mutarjim J-20, S-206)*

or Sakar Tajushshariyah Alaihir Rahma Se Isi Tarah Ka Sawal Hua Ki,

Exam Mein Students Copy Karte Hai. To Ek Shaks Ne Kaha Ki Is Bunyaad Pe Jo Job Milegi Woh Paisa Haraam Ho Ga? Kia Ye Durust Hay? 

Jiske Jawab Me Aap Farmate Hai,

Ye Hukm Durust Nahiñ He.. (Yaani Exam Me Copy Karne Ki Bunyad Par Jo Job Milegi Vo Paisa Haram Nahiñ He..)

Https://Www.Jamiaturraza.Com/Session/30mar14/5.Mp3

Lihaza Agar Kisi Ne Exam Me Copy Ki to Ye Najaaizo Gunah Ka Murtakib Hua Usse Taubah W Astagfar Lazim He, Or Usse Job Hasil Karna Bhi Jaaiz Nahiñ, Albatta Agar Kisi Ne Aysa Kar Liya to Agarche Ek Najaaiz Kaam Kiya Lekin Jo Tankhwah Milegi Vo Kaam Ke Badle Milegi, Agar Kaam Jaaiz He or Us Kaam Ko Matlooba Ahliyat Ke Mutabiq Durust Anjam Deta He to Tankhwah Me Milne Wali Raqam Halal Hogi..

Wallahu Ta'Ala Aa'Alam Bis-Sawab

*✍🏻Al-Jawab: Hazrat Maulana Ashraf Qadri Alimi Sahab Qibla*

*📬Madarsa Lateeful Uloom, Raza Nagar Jigna Mirzapur, Up*

*🗓️15 Oct 2025, 22 Rabi Ul Aakhir 1447*

*🌹SAWAL-O-JAWAB🌹F.T.S👑grp*

📲+918

*_📬Pathan Moin Raza Khan,Petlad Gujrat_*

•┈┈┈┈┈┈• • ✦ ✿ ✦ • •┈┈┈┈┈┈•

*Amanat Me Khayanat Na Kare Yaani Post Me Tabdili Karne Ki Ijazat Nahiñ. Agar Kuchh Khami Ya Lafzi Galti Nazar Aaye To Admin Se Rabta Kare*