Theke Par Qurbani Dene Me Jiske Naam Se Qurbani Ho Kya Uske Naam Se Hi Janwar Kharidna Hoga

 *Theke Par Qurbani Dene Me Jiske Naam Se Qurbani Ho Kya Uske Naam Se Hi Janwar Kharidna Hoga ?*

*🌹SAWAL:-🌹*

Assalamu Alaikum Warahmatullahi Wabaraktuh

Hazrat, Kya Yeh Mas'ala Durust Hai Hazrat?

Aksar Dekha Jata Hai Ke Jab Qurbani Ki Jati Hai, Tabhi Log Naam Lekar Qurbani Kar Dete Hain, Magar Zaroori Mas'ala Yeh Hai Ke Jab Janwar Kharida Jaye to Jinke Naam Ki Qurbani Honi Hai, Unhi Ke Naam Se Janwar Kharida Jaye, Warna Sirf Qurbani Ke Waqt Naam Lene Se Qurbani Nahi Hogi. Kyunki Jiske Naam Se Qurbani Honi Hai, Janwar Unki Milkiyat Mein Hona Zaroori Hai. Aur Kharidne Wale Log Janwar Ko Ikattha Kharid Lete Hain Aur Qurbani Ke Waqt Naam Se Qurbani Karte Hain, Yeh Jayaz Nahiñ Hai Aur Is Tareeke Se Qurbani Nahi Hogi.

*🌹JAWAB:-🌹*

وَعَلَيْكُم السَّلَام وَرَحْمَةُ اَللهِ وَبَرَكاتُهُ‎

Ji, Yeh Durust Mas'ala Hai...

Jaisa Ke *📚Sharai Council of India, Bareilly Shareef Ke Gyarahwein (11) Fiqhi Seminar* Mein Qurbani Ki Thekedari Ke Muta'alliq Kai Masaail Par Faisla Hua, Jismein Yeh Mas'ala Bhi Tha, Is Ke Muta'alliq Yeh Faisla Hua Ke, "Agar Thekedar Ne Muta'ayyin Janwar Kisi Ke Liye Kharida Aur Us Ke Hukm Se Qurbani Karai, to Bil-ittifaq Woh Qurbani Sahih Hui. Aur Agar Thekedar Janwar Pehle Se Khareed Le, to Woh Thekedar Hi Us Ka Malik Hai. Ab Ta-waqteeka Jin Ke Naam Se Qurbani Karni Hai, Woh Khud Muta'ayyin Janwar Us Se Na Khareedein, Qurbani Nahiñ Hogi. Ya Yeh Ke Qurbani Wala Kisi Ko Wakeele Shara (Kharidne Ka Wakeel) Banaye, Ya Thekedar Qurbani Karne Wale Ke Hukm Se Kisi Ko Wakeele Shara Muqarrar Kare, Aur Woh Wakeele Shara Muta'ayyin Janwar Ko Kharid Kar Qurbani Kare Ya Qurbani Ka Hukm De, to Qurbani Sahih Hogi, Warna Nahiñ."

Or Ham Ahle Sunnat Wal-Jama'at Ke Yahañ Jahañ Bhi Qurbaniyañ Hoti Hai Vo Wakalat Naama Qurbani Karne Wale Ko Bhejte Hai Or Unse Zimme Daraan Ko Wakeel Banane Ka Kahte Hai Is Taur Par Mazkoora Jo Wakaalat Ki Soorat He isi Tarah Agar Qurbani Kareñ To Qurbani Ho Jayegi..

Wallahu Ta'ala Aa'alam 

*✍🏻 Al-Jawab: Hazrat Mufti Dilshad Ahmad Ziyai Amjadi Sahab Qibla*

*📬Khatibo Imam Aala Hazrat Raza Jame'a Masjid,Gomoh, Dhanbad, Jharkhand*

*🗓️16 June 2025, 19 Zulhijjah 1446*

*🌹SAWAL-O-JAWAB🌹F.T.S👑grp*

📲+918

*_📬Pathan Moin Raza Khan,Petlad Gujrat_*

•┈┈┈┈┈┈• • ✦ ✿ ✦ • •┈┈┈┈┈┈•

*Amanat Me Khayanat Na Kare Yaani Post Me Tabdili Karne Ki Ijazat Nahiñ. Agar Kuchh Khami Ya Lafzi Galti Nazar Aaye To Admin Se Rabta Kare*