Panj Waqta Namaz Ki Sunnate Gair Moakkedah Or Nawafil Ki Jagah Qaza Namaz Parh Sakte He ?

 *Panj Waqta Namaz Ki Sunnate Gair Moakkedah Or Nawafil Ki Jagah Qaza Namaz Parh Sakte He ?*

*🌹SAWAL:-🌹*

Assalamu Alaikum Hazrat Bahut Aham Sawal Hai Mere Sawal Ka Jawab Dijiye Badi Meherbani Hogi Hazrat Hamari Kaza Namaz Hai Jo Humne Bachpan Se Lekar Abhi Tak Chhodi Hai Halanki Abhi to Ham Log Abhi Ki Namaje Ada Kar Rahe Hain Lekin Jo Hamari Chhut Gai Hai Usko Kaise Ada Karen Kya Ham Johar Ke Sunnat Ke Jagah Use Kaja Namaj Ki Niyat Kar Sakte Hain Sunnat Nafil Ke Jagah Har Namaj Mein Kaja Namaj Padh Sakte Hain Aur Agar Padh Sakte Hain to Uski Niyat Kaise Karenge Hazrat Inayat Farmaye..

*🌹JAWAB:-🌹*

وَعَلَيْكُم السَّلَام وَرَحْمَةُ اَللهِ وَبَرَكاتُهُ‎

Faraiz Aur Witr Ki Jitni Bhi Namaazein Qaza Hui Hain, Unko Jald Se Jald Ada Karna Zaroori Hai, Warna Uska Jawab Deh Hona Padega.

Rahe Sunnat Aur Nafl to Unki Qaza Nahiñ Hoti,

Albatta Waqti Namaaz Ke Saath Saath Qaza Namaazoñ Ko Bhi Padhna Chahta Hai to Nawafil Aur Sunan-E-Ghair Mu’Akkadah Ki Jagah Unki Niyyat Kar Sakta Hai. Balki Yahi Karna Chahiye Ke Jab Tak Zimme Mein Farz O Wajib Baqi Hain, Nafl Maqbool Nahiñ Hote.

Bahare Shariyat Me He,

Qaza Namaazein Nawafil Se Ahem Hain, Yaani Jis Waqt Nafl Padhta Hai Unhein Chhod Kar Unke Badle Qaza Padhe Ki Bari-Uz-Zimma Ho Jaaye. Albatta Taraweeh Aur 12 Rakaat Sunnat-E-Mu’Akkadah Ki Na Chhode.

*📚(Bahare Shariyat, H-4, Qaza Namaz Ka Bayan, Mas'Ala-36)*

Lihaza Awqaate Makrooha Ke Ilawa Jab Bhi Waqt Mile Apni Qaza Namaazoñ Ko Ada Karta Rahe, Aur Isi Tarah Nawafil Aur Ghair Mu’Akkadah Sunnatoñ Ki Jagah Bhi Unki Niyyat Kar Sakta Hai. 

Niyyat Ka Tareeqa Yeh Hai:

Agar Usko Maaloom Hai Ke Itne Saaloñ Ki Baqi Hain, Masalan 2022 Se Le Kar Ab Tak Baqi Hain, to 2022 Se 2025 Tak 3 Saal Hue, to Saal Ba-Saal Niyyat Karta Jaye.

Yaani 2022 Ki Fajar Ki, Zohar Ki, Asr Ki, Maghrib Ki, Isha Ki, Witr Ki Jo Farz Ya Wajib Qaza Ho Gayi Thi, Ab Usko Ada Karta Hoon. Is Tarah Ek Saal Tak Ada Kare.

Iska Aasaan Tareeqa Yeh Hai Ke Rozana 20 Rakaat (2 Fajr, 4 Zohar, 4 Asr, 3 Maghrib, 4 Isha, 3 Witr) Ada Kare to Ek Din Ki Qaza Poori Ho Jayegi.

Is Tarah Ek Saal Tak Har Roz 20 Rakaat Padhta Rahe to Ek Saal Ki Namaaz Ada Ho Jayegi, Phir 2023 Ki Shuru Kare, Isi Tarah Aage Badhe. 

Aur Agar Maaloom Nahiñ Ke Kab Se Baqi Hain, Sirf Itna Andaaza Hai Ke 6-7 Saal Ki Hongi, to Uske Liye Aasaan Tareeqa Yeh Hai Ke Niyyat Kare:

“Main Apni Zindagi Ki Sab Se Pehli Qaza Fajar Ada Kar Raha Hooñ”

“Sab Se Pehli Qaza Zohar Ada Kar Raha Hoon”

“Sab Se Pehli Qaza Asr…” Isi Tarah. Har Baar Niyyat Kare Ke Jo Sab Se Pehli Qaza Hui Thi Usko Ada Kar Raha Hooñ.

Isi Tarah Padhta Rahe Yahañ Tak Ke Itne Saal Guzar Jaayein Ya Usko Ghalib-E-Gumaan Ho Jaye Ke Ab Mere Zimme Koi Qaza Baqi Nahiñ Rahi. 

Ek Sawal Ke Jawab Mein Aala Hazrat Imame Ahle Sunnat Imam Ahmad Raza Khan (Rahmatullahi Alayh) Farmate Hain,

“Har Baar Yuñ Niyyat Kare Ke Sab Mein Pehli Woh Namaaz Jo Mujh Se Qaza Hui. Jab Ek Padh Li, Phir Yuñ Niyyat Kare Yaani Ab Jo Baqiyoñ Me Pehli Hai, Aakhir Tak Itni Padhe Ke Ab Us Par Qaza Baqi Rehne Ka Gumaan Na Rahe.”

*📚(Fatawa Razawiyya, Jild-8, Safha-163, Raza Foundation Lahore)*

Wallahu Ta'Ala Aa'Alam

*✍🏻Al-Jawab: Hazrat Allama Mufti Qasim Raza Sahab Misbahi*

*📬Khadim JRM Khambhat, Muqeem Haal Nadiyad, Gujrat*

*🗓️10 Dec 2025, 18 Jumadil Aakhir 1447*

*🌹SAWAL-O-JAWAB🌹F.T.S👑grp*

📲+91

*_📬Pathan Moin Raza Khan,Petlad Gujrat_*

•┈┈┈┈┈┈• • ✦ ✿ ✦ • •┈┈┈┈┈┈•

*Amanat Me Khayanat Na Kare Yaani Post Me Tabdili Karne Ki Ijazat Nahiñ. Agar Kuchh Khami Ya Lafzi Galti Nazar Aaye To Admin Se Rabta Kare*