*Taraweeh Ka Nazrana Tay Karne Ka Jaaiz Tareeqa*
*🌹SAWAL:- 🌹*
Kya Koi Aisi Jaaiz Soorat Hai Ke Tarawih Ka Paisa Pehle Tay Kar Liya Jaye? Ek Aalim Ne Kaha Ke Pehle Se Tay Karne Wale Hafiz Ke Peeche Namaz Nahiñ Hoti. Kya Yeh Baat Sahih Hai?
Saail: Muhammad Anwar Bihar
*🌹JAWAB:-🌹*
Tarawih Ka Paisa Tay Karna Yaani Tarawih Par Ijarah Karna Jaaiz Nahiñ Hai, Kyunki Yeh Ta‘at Par Ijarah Hai Aur Ta‘at Par Ijarah Jaaiz Nahiñ Hai Ke Qur'an Paak Padhne Aur Tilawat Karne Ka Paisa Liya Jaye.
Lihaza Jis Ne Yeh Kaha Ke Tarawih Ka Paisa Tay Karne Wale Ke Peeche Namaz Nahiñ Hoti, Woh Is Had Tak Sahih Hai Ke Aisa Shakhs Najaaiz Kaam Kar Raha Hai, to Us Ke Peeche Namaz Makrooh Hui. Aise Shakhs Ke Peeche Namaz Tarawih Na Padh Kar Ke Koi Aise Shakhs Ke Peeche Tarawih Padhni Chahiye Jo Tarawih Ka Paisa Tay Na Kare..
Tarawih Ka Nazrana Jaaiz Ho Jaye, Is Ki Soorat Yeh Hai Ke Masjid Ki Intizamiya Ya Mutawalli Hafiz Sahib Ko Tay Karein to Mutlaqan Ujrat Par Rakhein, Tarawih Ka Naam Na Lein, Qur'an Paak Padhne Ka Naam Na Lein, Balki Yeh Kahen Ke Shaam Mein Itne Baje Se Itne Baje Tak Tum Ko Hamari Masjid Mein Rehna Hai, Hum Koi Munasib Kaam Denge Aur Us Ki Ujrat Itni Hogi.
Yuñ Hafiz Sahib Bhi Ujrat Tay Kar Sakte Hain, to Yeh Ek Mutlaq Ijarah Ho Gaya, Yeh Durust Hai, Kyunki Is Mein Qur'an Paak Padhne Par Ijarah Nahiñ Kiya Gaya, Balki Ek Jagah Rehne Par Ijarah Kiya Gaya, Jab Un Ko Rakh Liya Gaya to Phir Un Se Kaha Jaye Ke Tum Tarawih Padhawo Aur Woh Taraweeh Padhayein, Ijarah Durust Ho Gaya. Yeh Waqt Ka Ijarah Hua, Tarawih Ka Ijarah Nahiñ Hua.
Ya Phir Koi Aur Kaam Shamil Kar Lein, Maslan Namaze Maghrib Ya Namaze Isha Ki Imamat Ka Ijarah Kar Lein Ke Aap Har Roz Hamare haañ Namaz Isha Ki Imamat Karenge Aur Hum Aap Ko Itni Tankhwah Deñge. Yahi Muamla Hafiz Sahib Ka Bhi Hai, Intizamiya Un Ko Hire Kare Ya Hafiz Sahib Baat Karein Ke Main Isha Ki Namaz Aap Ke Haañ Padhawoonga, Itne Se Itne Waqt Par Rahunga, Itni Ujrat Honi Chahiye, Aur Phir Tarawih Bhi Padhayein.
Aur Ab Jo Kuchh Nazrana Mile Woh Durust Hai.
Wallahu Ta‘ala Aa'alam
*📚(Sawalo Jawab Maahe Ramzan 1447 H, Safha-29, Az: Mufti Faizanul Mustafa Qadri Amjadi Sahab)*
*✍🏻Pathan Moin Raza Khan,Petlad Gujarat*
*🗓️19 March 2026, 29 Ramzanul Mubarak 1447*
📲+918
*🌹SAWAL-O-JAWAB🌹F.T.S👑grp*
•┈┈┈┈┈┈• • ✦ ✿ ✦ • •┈┈┈┈┈┈•
*Amanat Me Khayanat Na Kare Yaani Post Me Tabdili Karne Ki Ijazat Nahiñ. Agar Kuchh Khami Ya Lafzi Galti Nazar Aaye To Admin Se Rabta Kare*
Comments
Post a Comment