Mobile Me Qur'aan Shareef Ho to Bagair Wuzu Chhuna Kesa ?

 *Mobile Me Qur'aan Shareef Ho to Bagair Wuzu Chhuna Kesa ?*

*🌹SAWAL:-🌹*

Jis Mobile Me Quraan Ho Use Bagair Wuzu Chhuna Kesa Or Jis Jagah Quraan Ki Aayat Screen Par Nazar Aati Ho Kya Use Bhi Chhu Sakte He ?

*🌹JAWAB:-🌹*

اَلسَلامُ عَلَيْكُم وَرَحْمَةُ اَللهِ وَبَرَكاتُهُ

Mobile Me Qur'aan Shareef Rakhna Application Ki Shakl Me Ya Pdf Ya Photo Ya Kisi Tarah Bhi Ho Jaaiz He.. Or Mobile Me Qur'aan Shareef Screen Par on Ho Screen Par Nazar Aata Ho to Iska Hukm Ye He Ki Qur'aane Paak Ke Huroof Be Ayni Hi Mobile Me Nahiñ Jaate, Balki Kuchh Nuqoos Kuchh Shuaaye Uske Andar Jaati He or Kuchh Shuaaoñ Ka Hukm Quraan Ka Nahiñ He (Yaani Pure Mobile Ka Hukm Quraan Ka Nahiñ He)... Albatta Jab Mobile Khola Jata He to Screen Par Machine Zaraye Se Huroofe Qur'aniya Nazar Aate He, Yaani Screen Par Qur'aan Shareef Nazar Aane Se Pure Mobile Ka Hukm Qur'aan Ki Tarah Na Hoga, Is Liye Jahañ Screen Par Qur'aan Shareef Nazar Aata He Uske Alawa Mobile Ki Body Ko Side Me Se Ya Pichhe Se Wagairah Jagah Be Wuzu Chhuna Jaaiz He, Isme Harj Nahiñ..

Or Jis Screen Par Qur'aan Ki Aayateñ Nazar Aati Ho, Uske Baare Me Fuqha E Kiraam Ne Ye Faisla Farmaya Ki, Jis Tarah Kisi Kagaz Par Qur'aan Ki Aayat Likhi Jaaye or Us Par Lamination Kar Diya Jaye, Ya Aysa Mas'haf Shareef Ho Jis Par Lamination Kiya Hua Ho to Us Kagaz Ya Mas'haf Shareef Ko Chhuna Jaaiz Nahiñ, Ki Ab Vo Kagaz Hi Ke Hukm Me He Be Wuzu Usko Nahiñ Chhu Sakte Isi Tarah Agar Mobile Ki Screen Par Jo Glass Laga Hua He or Andar Ke Huroof Us Screen Ke Glass Se Chipke Huve He to Bila Wuzu Us Screen Par Hath Lagana Goya Bila Wuzu Quraan Ko Hath Lagana He, Lihaza Mobile Ki Screen Par Jis Jagah Aayate Qur'aniya Nazar Aati Ho Khas Us Jagah Bila Wuzu Chhuna Jaaiz Nahiñ...

Is Ta'alluq Se Aulma E Kiram Ke Do Pahlu He,

Ek Majlise Sharaee Ke Faisle Me He Ki, Jis Jagah Screen Par Qur'aan Ki Aayat Nazar Aati Ho Use Bila Wuzu Chhuna Jaaiz He, Magar Ehtiyaattan Ba Wuzu Hi Chhune Ka Hukm Diya He..

Jaisa Ki Usi Me He,

Screen Par Qur'aani Aayat Jahañ Nazar Aati Ho Us Jagah Bila Haail Be Wuzu Chhuna Jaaiz He...

Magar Riaayat Khilaf Ke Liye Mandoob Ye He K Use Bhi Be Wuzu Na Chhuye.

*📚(Majlise Sharaee Ke Faisle, J-2, S-136, Faisla-62)*

Or Sharae Council of Bareilly Shareef Me Ye Tay Hua Ki,

Screen Par Jo Maktoob Nazar Aata He Vo Shuaai Nuqoos Qabile Qiraat Hai Vo Maktoob Hi Hai Agarche Kisi Sabab Se Vo Muqbadil Zaail Ho Sakte Hai Is Liye Jab Tak Vo Screen Par Numayañ Hai Agar Aayate Qur'aniya Hai Unka Be Wuzu Chhuna Jaaiz Nahiñ Ki Zujaaji Rang Ka Gilaf Screen Se Mutassil He or Screen Ke Amal Me Dakheel Bhi He or Muhaddis Ko Be Chhuve Parhne Me Harj Nahiñ..

Purane Qism Ke Computer Me Kai Zujaji Gilaf Hote Hai Bahar Wala Shisha Screen Se Mutassil Hota He Screen Par Aayate Qur'aaniya Maktoob Hoñ to Bahar Wale Shisha Ko Muhaddis Ko Chhuna Na Chahiye Ki Bazahir Vo Aayateñ Usi Bayrooni Shisha Par Nazar Aati Hai.

Or Screen Par Jo Kuchh Kitabat W Tasweereñ Nazar Aati Hai Vo Aks Nahiñ Balki Vo Ba Aynihi Maktoob W Tasweer Hai Aks Ko Negative Kahte Hai or Screen Par Jo Nuqoos, Tasaweer Hai Vo Positive Hai Shar'an Unka Hukm Kagzi Tahreer W Tasweer Ki Tarah He.

*📚(Faisla Jaat Sharaee Council Bareilly Shareef, S-200,201)*

Lihaza Screen Par Jahañ Quraan Ki Aayat Nazar Aaye Khas Us Jagah Khas Us Screen Par Bila Wuzu Us Jagah Par Chhuna Jaaiz Nahiñ.. Screen Par Touch Kare Bagair Be Wuzu Parh Bhi Sakte He.. Uske Alawa Mobile Me Kisi Bhi Jagah Be Wuzu Chhu Sakte He Isme Harj Nahiñ... Or Mobile Dekh Kar Quraan Shareef Parhne Ka Wahi Sawab He Jo Quraan Parhne Ka He Albatta Jo Mas'haf Shareef Ko Dekh Kar Parhne Ka Sawab He Vo Na Hoga..

Wallahu Ta'ala Aa'alam Bis-sawab

*✍🏻Pathan Moin Raza Khan,Petlad Gujarat*

*🗓️23 March 2025, 22 Ramzanul Mubarak 1446*

📲+9184

*🌹SAWAL-O-JAWAB🌹F.T.S👑grp*

•┈┈┈┈┈┈• • ✦ ✿ ✦ • •┈┈┈┈┈┈•

*Amanat Me Khayanat Na Kare Yaani Post Me Tabdili Karne Ki Ijazat Nahiñ. Agar Kuchh Khami Ya Lafzi Galti Nazar Aaye To Admin Se Rabta Kare*