Ye Kahna Ki "Kisi Lash Ki Sanakht DNA Test Wagairah Science Se Hoti He Koi Dharm Kaam Nahi Aaya" ? Or Kya Islam Me Pahle Lash Ki Sanakht Ka Koi Tareeqa Tha ?

 *Ye Kahna Ki "Kisi Lash Ki Sanakht DNA Test Wagairah Science Se Hoti He Koi Dharm Kaam Nahi Aaya" ? Or Kya Islam Me Pahle Lash Ki Sanakht Ka Koi Tareeqa Tha ?*

*🌹SAWAL:-🌹*

Assalamu Alaikum Warahmatullahi Wabarakatuh,

Ek Plane Crash Mein Logon Ki Jal Kar Maut Ho Gayi, DNA Test Karke Laashein Ghar Walon Ko Di Gayi.

Ek Shakhs Kehta Hai Ki Yahan Laashon Ki Pehchaan Karne Ke Liye Science Kaam Aaya, Kisi Ka Deen Ya Dharm Kaam Nahi Aaya..

Ulama-E-Kiram Ki Bargah Mein Sawal Hai Ki Islam Mein Jal Kar Marne Wale Ki Pehchaan Ke Liye Koi Tareeqa Hai?

*🌹JAWAB:-🌹*

وَعَلَيْكُم السَّلَام وَرَحْمَةُ اَللهِ وَبَرَكاتُهُ‎

Ilmo Fann Ki Tareekh Gawahi Deti Hai Ke Musalman Uloomo Maarifat Ke Har Maidan Mein Bunyadi Kirdar Ada Karte Aaye Hain. 

Khwarizmi Ne Hisaab Ke Qawaid Ko Dastavezi Shakl Di, Ibn-Ul-Haysam Ne Manaazir (Optics) Ke Asraat Wazeh Kiya, Jabir Bin Hayaan Ne Kimiyaai Usool Murattib Kiye, Aur Bu Ali Seena Ne Tibbi Uloom Ke Jaame'a Qawaid Muqarrar Kiye. 

Yeh Woh Daur Tha Jismein Baadshahoñ Aur Hukmaranoñ Ne Ilm Ki Sarparasti Ki Aur Musalmanoñ Ne Duniya Ko Naye Falsafi Aur Sciency Raahein Dikhayi. Isi Pas Manzar Mein Sawal Paida Hota Hai Ke Kya Us Waqt Mein DNA Ya Us Se Mushabaah Koi Sciency Tareeqa Maujood Tha?

Is Sawal Ka Saabit-Shuda Jawab Yeh Hai Ke DNA Ki Haqiqat, Jise Hum Aaj Ke Daur Me Jante Hai, Qadeem Zamane Mein Kisi Bhi Qaum Ke Paas Maujood Nahiñ Thi. DNA Jaisi Baarik ReshaDaar Saakht Tak Pahunchna Us Waqt Mumkin Hi Na Tha, Kyunki Us Ke Liye Tajrbaati Mahool, Intehaai Bareek Aalaat Aur Jism Ke Zarrati Maraahil Ke Ilm Ki Zaroorat Thi.. Jo Us Daur Ke Sciency Nizaam Ka Hissa Nahi The. 

Magar Is Ka Ye Matlab Hargiz Nahiñ Ke Musalman Wirasat Aur Nasli Asraat Ke Ilm Se Be-Khabar the. Balke Musalman Fuqaha, Muhaddiseen Aur Hukmaa Ne Virasat, Mushabahat, Nasli Intiqaal Aur Khandani Sifaat Ke Baare Mein Itna Mazboot Aur Gehra Kaam Kiya Ke Usi Genetics Ki Intedaai Fikr Kaha Ja Sakta Hai. 

Wirasat Ke Ilm Par Musalmanon Ki Bunyadi Tehqiq Me imam Abu Hanifa Radiallahu Anhu Ne Nasab, Mushabahat Aur Aulaad Mein Zahir Hone Wali Khandani Sifaat Ke Usool Is Tarah Wazeh Kiye Jo Aaj Ke Wirasati Usool Se Badi Had Tak Mutaabiqat Rakhte Hain.

Imam Shafai Alaihir Rahma Bayan Farmaate Hain Ke:

“Awlad Kabhi Walid Ki Sifaat Par Hoti Hai, Kabhi Waalida Ki Sifaat Par, Aur Kabhi Door Ke Qarabatdaaroñ Ki Sifaat Bhi Ikhtiyar Kar Leti Hai.”

Aaj Isi Baat Ko Wirasati Istilaah Me “Dominance Aur Recessiveness” Ke Taur Par Bayan Kiya Jata Hai. Kutube Hadees Mein Mushabahat Yani Shaklo Surat, Mizaaj Aur Khalqiyaat Ke Intiqaal Ke Abwaab Maujood Hain. Yeh Tamam Baatein Wirasati Intiqaal Ke Usooloñ Ki Taraf Raahnumaai Karti Hain.

Muslim Hukma Ka Sciency Tajziye Ke Bare Me Abu Bakr Raazi Alaihir Rahma Likhte Hai Ki, 

Ba'az Amraaz Nasl Dar Nasl Muntaqil Hote Hai, Jaise Rang, Aankhoñ Ki Kefiyat, Chahere aki Saakht Aur Jismani Hay’at Walidain Se Aulaad Tak Muntaqil Hoti Hain.. Yeh Baat Jadeed Genetics Ke Bunyadi Usooloñ Se Wazeh Mutabiqat Rakhti Hai. 

Bu Ali Seena (Ibne Sina)

Apni Mashhoor Tibbi Tasneef “Al-Qanoon Fil-Tibb” Mein Farmate Hai Ki,

Aulaad Walidain Ki Sifaat, Mizaj Aur Ba’az Amraaz Tak Wirasat Ke Zariye Hasil Karti Hai.

Yeh Haqiqat "Mendel" Ke Wirasati Qawaneen Bayan Hone Se Kai Sadiyoñ Pehle Musalmanoñ Ki Ilmi Riwayat Me Maujud Thi. 

Agarche Us Zamana Me DNA Test Jaisa Koi Tareeqa Muajud Nahiñ Tha, Lekin Qadeem Wirasati Jaanch Ke Kuchh Tareeqe Zaroor Raaij The. Yaqeenan DNA, Gyns Aur Kromosom Ki Haqiqat Us Daur Mein Maloom Na Thi. Magar Musalmanon Ke Qanooni Aur Tibbi Nizaam Mein Ayse Tareeqe Maujud The Jo Aaj Ke 'Pre-Genetic Tests' Se Kaafi Had Tak Mushabeh The..

Nasab Ki Pehchaan (Qadeem Paternity Test)

Muslim Adaalati Aur Tibbi Maahol Mein Aulaad Ke Nasab Ke Taayyun Ke Liye Darj Zail Cheezoñ Ka Jaaiza Liya Jata Tha,

Chehre Ki Hay’at,

Aankhon Or Bhawoñ Ki Shakl,

Rango Roop,

Jismani Saakht,

Baalon Ki Nui'Yat

Yeh Tamaam Asraat Aaj "Phenotype Comparison" Ke Naam Se Jaane Jaate Hain.

Khoon Ke Mizaj Ka Muwaazana

Kuch Hukma Khoon Ki Bundoñ Ke Rang, Kefiyat Aur Haraarat W Baroodat Ka Taqabul Karke Nasli Qurbat Ka Andaza Lagate the.

Yeh Agarche Mukammal Sciency Tareeqa Nahin Tha, Lekin Iska Rukh Bhi Genetics Ki Taraf Hi Tha..

Janwaron Mein Intikhaabi Nasal Saazi (Selective Breeding)

Musalmanoñ Ne Arabi Ghodoñ, Untoñ, Baazon Aur Shikari Kuttoñ Ki Behtareen Nasal Saazi Paida Kiñ..

Aaj Is Amal Ko Selective Breeding Kaha Jata He. Or Ise Giniyaat Ki Amali Ibtida Samjha Jata He..

Lihaza Yeh Kehna Ki Science Kaam Aaya, Mazhab Kaam Nahi Aaya Mahaz Jahalat Or Nadaani He. 

Science Aql Se Paida Hui Aur Aql Allah Ta'ala Ki Ata He..

Aur Aql Ko Jo Shaour Hasil Hua Woh Deen Ke Zariye Mila. Warna Science to Gobar Ke Bhi Fayde Batata Hai, Magar Shaour to Kehta Hai Ki Falañ Cheez Napaak Hai, Falañ Paak, Aur Yeh Shaour Deen Ke Zariye Hasil Hota Hai. Islam Ek Deen Hai, Quran W Ahadees Mein Allah Wa Us Ke Rasool Ahkaam Aur Deen Ke Usool Bayan Kiye Gaye Hain. Islam Kisi Laboratory Ka Naam Nahiñ He Ki Us Mein Yeh Bataya Jaaye Ki Marne Wale Ki Sanaakht Kese Hogi Ya Zinda Ka Nasab Kaise Maloom Hoga.. 

Allah Tabarak Wa Ta’Ala Ne Dunya Ne Asbaab Paida Farmaye Hai Or Unhu Asbaab Ke Zariye Haqaaiq Maloom.Kiye Jate Hai..

Aaj Laboratory Hai, DNA Testing Hai Or Un Ke Zariye Nasab Wagairah Ka Ilm Hasil Kiya Jata He. 

Aur Jaisa Ki Upar Tafseel Se Bayan Kiya Ja Chuka Hai Ki "DNA Testing" Ke Buniyaadi Tasawwuraat Or Usooloñ Ki Fikri Bunyad Musalmanoñ Ke Aulma Or Hukma Ki Tahqeeqat Me Maujud Thi.. Or Unhiñ Ilmi Buniyad Par Baad Ke Adwaar Me Ye Jadeed Tareeqe Wujood Me Aaye.

Wallahu Ta'ala Aa'alam Bis-Sawab 

*✍🏻Al-Jawab: Hazrat Maulana Saiyed Shadab Qadri Razvi Sahab, Meerut, Up*

*🗓️11 Dec 2025, 19 Jamadi Ul Aakhar 1447*

*🌹SAWAL-O-JAWAB🌹F.T.S👑grp*

📲+918

*_📬Pathan Moin Raza Khan,Petlad Gujrat_*

•┈┈┈┈┈┈• • ✦ ✿ ✦ • •┈┈┈┈┈┈•

*Amanat Me Khayanat Na Kare Yaani Post Me Tabdili Karne Ki Ijazat Nahiñ. Agar Kuchh Khami Ya Lafzi Galti Nazar Aaye To Admin Se Rabta Kare*